 |
|||||||||||||||||
 |
 |
 |
 |
 |
 |
 |
|||||||||||
 |
 |
 |
 |
 |
 |
 |
 |
 |
 |
 |
 |
||||||
 |
 |
 |
 |
 |
 |
||||||||||||
 |
|
|
|
|
|
|
|
|
|
|
|
|
|
|
|
|
|
向來追求健康優質生活的蘇玉華，自從跟漁農自然護理署的農業主任Michael成為朋友後，樂得做半個農夫，支持環保有機菜。
有美女廚神之稱的蘇玉華，向來講求健康生活，當她得知有機菜既環保又有營養，更樂意向這方面加以探索，最近她跟Michael談到有機耕種後，更樂做半個農夫！
蘇：蘇玉華 M：Michael
蘇：呢幾年愈來愈多新聞報道話o的食物有毒，真係冇啖好食，係時候反省對食物o既認知！既然食係基本需要，注重質素同營養好重要，有機菜就優質兼環保！早幾日我用有機椰菜、番茄同南瓜等炮製o左個雜菜湯，o的菜o既質感同鮮味好好，有番小時候嘗到o既菜味！不過我洗椰菜時有十幾條菜蟲，o的菜甜到連o的菜蟲都吼！
M：o個o的叫做菜青蟲，你知唔知o的卵成蟲後係咩？係蝴蝶o黎o架！有蟲可能係有機菜農未算種得最好，如果進步o的，可以種出完美o既有機菜。好似日本，蘋果樹上每個蘋果已經獨立包裝咁種，每個都有保護網掩住防蟲。
蘇：睇過一篇報道，一個40歲o既外國總裁退休後走去做農夫，除o左食番自己種o既o野好有滿足感外，因為耕種太辛苦，令佢減o左20磅同珍惜食物！
M：支持有機菜唔止為健康，耕種過程亦夠環保，用o既飼料都係取自天然，o係土地容易分解，唔會殘留o係植物當中，例如枯葉、粟米同屠房切下o既動物骨咁。香港舉行馬術比賽，馬會提供大量馬糞，都係有機飼料o既來源之一。有機方法係用益蟲控制害蟲，唔用農藥，唔會將益蟲害蟲一併殺晒，破壞土地同生態！種有機菜係睇時令，呢個對環境有好大影響，因為植物都會生病，若配合季節栽種，病菌散播都冇咁多。
自種士多啤梨
蘇：之前跟大宇去日本福岡一個士多啤梨場拍《和味濃情》，大家都開心到跑來跑去，跑完隨手摘𨪛食，又甜又多汁，好滿足呀！香港好可悲，o的地只係不斷用o黎起樓，新一代唔知棵菜原來o係田園時咁可愛！
除o左食多o左有機菜，我仲o係屋企種菜心！我住村屋，可以o係o的發泡膠箱發泥，再加o的肥料，日日淋水好簡單，雖然味道唔及街市o個o的，不過話晒自己種，食都食得開心o的！最近仲學種有機士多啤梨，每日淋o下水就得，不過味道就唔及你o係果園摘出o黎o個o的，點解呢？
M：香港1至3月係士多啤梨當造季節，士多啤梨唔鍾意太濕o既環境，所以兩至三日淋一次水就夠，佢o地鍾意曬太陽！有幾種果菜可以o係屋企種，例如士多啤梨、菠蘿、紅蘿蔔同合掌瓜等，呢類都係有葉o既蔬果，趁佢新鮮時將有葉頭部分切出o黎，放入水浸至生根，就可以加入有機飼料種，每日淋水就可以！至於住宅環境就只適合種香料類。o係屋企種o既士多啤梨唔及果園o個o的咁靚，因為果園有蜜蜂傳播花粉，令農作物更茂盛！
如何分辨有機菜？
Michael坦言單靠肉眼很難分辨，須靠標籤識別：「大家記住，唔係有菜窿就係有機菜！所以要睇間店舖有冇貼出一張政府發出o既有機認可證，現時有機專員中心有40個會員。」
Go! 有機農場割靚菜
香港現時有十多個有機農場，大部分採開放式，致電預約便可到農場一嘗新鮮摘下的生果，又或者睇中靚菜，即場跟農夫議價，割下新鮮蔬果煮幾味。逢周日早上9時至下午5時，大埔太和路舉行假日農墟，售賣有機菜。醒個小貼士大家，想買好o野請趁早，因為通常11時左右，靚菜都會售罄！
希望能自種健康食物。
