美女廚神蘇玉華嘗盡中外佳餚，足跡踏遍歐洲，閒時喜愛煮撚手的鮮番茄汁意大利粉宴客。崇尚健康的阿蘇，酷愛以橄欖油及番茄烹調的西班牙菜。堪稱經典的「蒜香番茄多士 」有營養之餘，亦令人食得安心又放心！

美女廚神阿蘇廚藝了得，全因她喜歡去旅行，到處品嘗佳餚。多次遊歷英國的阿蘇，原來未去過西班牙：「去過歐洲好多次喇！可能因為咁，所以我比較鍾意煮西餐，咖喱雞都煮得唔錯o架！我通常都會煮鮮番茄汁意大利粉。其實煮o野食最開心o既係可以同一班朋友分享，所以好多時我都會煮o黎請朋友食。」

獨愛墨魚仔冇添加

放下鑊剷，阿蘇便會走遍各大食肆，西班牙菜便是她推崇備至的菜式之一：「我好鍾意食西班牙菜，因為當中有好多款式o係其他地方搵唔到，譬如蒜香番茄多士就係一個經典。因為我好鍾意食番茄，又好味又健康！仲有一款係墨魚仔，全碟都係黑色，因為係運用番佢本身o既墨汁，完全唔使加色素，味道好天然。」

西班牙菜中還有多種不同款式的小食，極討女士歡心。不過，當中最叫阿蘇喜愛的是西班牙人喜歡用橄欖油及番茄烹調，合乎阿蘇注重健康的飲食原則，她說：「人生最大o既投資就係要健康，所以我好錫身，平時一定要多飲水同有充足o既睡眠，o的食物除o左好味之餘，最緊要都係健康。」