美女廚神蘇玉華(阿蘇)與年輕有為的時裝設計師郭翠華(Ranee)，早前合作為香港進食失調復康會宣傳，要告訴姊妹們吃得飽一樣能穿得美，骨杉杉不是靚的定義，阿蘇與Ranee更趁機分享心底裡對時代女性的看法。

肥女人被形容為「豬扒」，她們因此節食以求纖瘦身形，令不少女生都有進食失調之苦，阿蘇與Ranee兩位靚女都擁有不俗外形，她們看女人的美，著眼都不在外觀上。

Ranee: 我覺得任何一個女人都靚，靚唔能夠只係講樣貌身形，內涵先係最重要，女人 o 既魅力要經過相處先可以真正領略到，所以我覺得女人愈老愈靚。

阿蘇: 係呀，每個人都有獨特 o 既美，靚根本無標準，只要你肯要求自己靚，你就可以靚。女人唔使一定要介意自己有幾多條皺紋，無人可以永遠十八、廿二，你唔覺得自己靚，你就永遠唔會靚。

Ranee: 我見到好多六、七十歲 o 既婆婆都好靚，好高貴，一頭銀白頭髮，掛住個笑容，我成日諗，到我八十歲都可以咁就好啦。

阿蘇: 經歷都會令人變靚。

Ranee: 內在發揮出 o 黎 o 既靚，先至係永恆。

美麗並非成功捷徑

人要成功，可以有很多方法，尤其是美麗的女人，天賦嬌媚是換取成功的捷徑，不過阿蘇與 Ranee 卻不太認同，她們是用勞力換取成績。

阿蘇: 經歷對一個人好重要，所以我唔覺得由低做起有乜問題，亦唔覺得行捷徑有著數，每個階段都有唔同 o 既挑戰，尤其係經過磨練先得到 o 既經歷，先至最令人甘之如飴，依家又唔係賽跑，跑快 o 的又點呢？生命係鬥遠，唔係鬥快，努力做好先係最重要。

開舖賣衫遇怪事

Ranee: 我從來都無諗過，女人要成功，可以有乜捷徑，當年我開舖，連裝修都要自己落手落腳做， o 個時因為無乜錢，收 o 左舖就 o 係舖度目訓埋 …

阿蘇: 前舖後居 ?

Ranee: 係呀，哈哈， o 個度好近間廟，我好記得第一晚入去目訓，不斷夢見個阿婆猛拉我叫我走，跟住我就叫番佢走，之後同朋友講，佢 o 地都覺得可能有 o 的意思，所以叫我搬，但我又唔係好驚，我唔係好信呢 o 的 o 野。不過住 o 左十一個月最後都要搬，因為 o 個個係舊式單位，每日要拉好重 o 既鐵閘，真係太重，頂唔順。可能我習慣靠自己，當年初初 o 係紐約做衫，最記得一個人拎住幾袋衫搭的士，仲重到不得了，但係 o 的司機好衰，唔會落車幫手搬，所以我唔覺得女仔有著數，亦唔覺得女仔可以易 o 的成功，唔努力唔勤力，幾靚都無用。

阿蘇: 我都係咁諗。

Ranee: 你都係演得好，人 o 地先搵你做啦 !

阿蘇: 我阿媽成日都教我做人要腳踏實地，當然會有人用旁門左道，但大家唔同 Level 囉。

Ranee: 係呀，邊個知行捷徑 o 既人條路一定易行？我真係唔恨，我覺得人 o 地會羨慕我多 o 的，哈哈…

搵伴侶最緊要 o 岩

人說男人不愛女人太獨立，太強的女人情路不易行，阿蘇和 Ranee 證明了這想法不是絕對。

阿蘇: 我覺得女人無論想搵男伴、男友或丈夫都好，唔係要搵最好，係要最 o 岩，點為之好？最好未必最 o 岩自己，所以要清楚自己需要，我喜歡一個人，會想同佢一齊生活，所以大家一定要相處到，佢要係一個有樂趣、開心、了解同明白我 o 既人，仲要補充我不足之處，咁先長遠。

Ranee: 我呢方面係學習階段，我工作係一個人做，唔需要人幫，事事自己決定，但我認同要搵「 o 岩」，唔係搵「好」，互相了解好重要。