香港地實在沒有幾多個真正的演員，Fans街頭舉牌尖叫所捧的，只屬明星偶像級範疇。 從來沒見過有人舉著蘇玉華大字牌尖叫：「阿蘇！阿蘇！」

蘇玉華笑了起來：「唔好！我驚我會忍唔住笑！」她甚麼都想低調，Fans要支持，路過點個頭微笑就夠了，反正這些年來，阿蘇的路都是這樣走出來的。

阿蘇從來沒有叫父母擔心，踏入學校開始便品學兼優，放學回家湊細佬妹煮飯洗衫乜都齊：「其實應該要有自己本分，爸爸媽媽忙住工作，我屋企冇錢，好窮，家頭細務就要靠大家去分擔，我哥哥姐姐長大亦要外出賺錢養家，大家幫幫手，令大家舒服o的係應該o既，我自小就學識呢個係自己責任。」

模範生永遠Say Yes
由幼稚園第一年開始，一直到小學，共九年，阿蘇總被讚得天花龍鳳，特級操行加頂級XO成績，行長班長風紀瓣瓣做齊，年年都是模範學生，這種狀態，一直維持到初中。

「我當然冇學壞，只不過有一日，腦中突然叮一聲，反問自己，我咁乖做乜？其實乖係冇用，因為乖只係可以Say Yes，唔可以Say No；學懂Say No唔代表反叛，人o地講乜就做乜根本唔會學到o野，原來反問反思反證，先可以o係思考過程入面令思維擴闊。所以由中一中二開始，我成個人變得好活躍，因為我開始敢言，敢同人接觸，令自己更加全面。」

挑戰校長累學妹當殃
阿蘇「三反」過後愈來愈活躍，讀的是女校，是課外活動風頭躉，參加聖約翰救傷隊，成為了Chairman（主席），經常領著師妹大搞活動，多年來一直相安無事，就在阿蘇為應付考A Level而由師妹接棒時，便有人壯烈犧牲。

「o個年我讀緊中六，以前每年都有搞全港聖約翰救傷隊聚會，校長知道後極力反對，因為佢認為我o地係為o左識男仔，我即時走去校長室理論，但好平心靜氣，只係想佢知道，我o地要識男仔，唔使搞咁多o野，校長拗我唔贏，Party照開，但師妹就無端端被記小過，真係好冇理由。」

設身處地凡事多面睇
平和的阿蘇，凡事從多角度去想：「我自己係屬於幾理智幾講道理，我從來都唔覺得一件事o既發生係偶然，如果下下都係由自己角度出發，對成件事係好唔公平，講番套劇《男人之苦》，如果我自己o既伴侶好似松哥（劉松仁）個角色咁，去o左滾，要原諒真係好難，但係我一定會去睇o下係咪自己都有責任？因為兩個人真心o係埋一齊，唔可能仲有空間去滾，咁到底係咪因為自己出錯？我唔信單方面會引發事情，大家肯企o係人o地立場，見到o既會多好多。」

「千祈咪踩我底線！」
「有好多所謂不如意o既事，咁多年o黎，我自己都可以處理得到。我係隨和，但唔代表我冇要求；我容忍度都幾大，亦唔代表我冇脾氣，我可以好惡好惡，只要踩到我o既底線，我有兩個選擇，一係抽身離開，一係就反擊。」

阿蘇曾經被偷影，也曾在街上與男友吃完飯後被記者圍影，看完報道，卻只哈哈兩聲！事實被跟蹤的兩天，阿蘇的生活的確是如此這般而已。

「我o既職業係演員，放工之後同所有人一樣有自己生活，我鍾意牛記笠記踢拖行街，總之我要有自己o既空間，唔會因為畀人影而改變自己o既生活模式。」

後記：路人甲乙丙…

第一次，有藝人做完訪問會主動一齊影合照，其實可能是為了打圓場，因為問了兩次如何看香港娛樂圈，阿蘇避而不談：「唔講呢o的，太廣泛，而且我冇資格評論。o黎！影張相！」更有可能的是，蘇玉華的確幾隨和，她會拍你膊頭叫你名字，職業是演員，從公仔箱、小舞台或大銀幕走出來後，個個還不是一樣是「你我他」。