蘇玉華專 歐錦棠強 同一類人 唔要下一代
  
 
 
 
 
 
 
 
 

有留意電視的人，相信都應該聽過或講過以下對白：
「嘩！o個個邊個o係亞視o個套咩戲o個度扮李小龍好鬼似喎！」

仲有一個 …
「有冇睇過o個個，以前做舞台劇幾靚o個個係港姐o黎o架！」

一段日子後 …

「歐錦棠o係《烈火雄心2》個師父仔角色幾正呀 …」
「蘇玉華o係《婚前昏後》度搶晒阿姐鏡呀 …」

以為每一個人都有一個姓名，但娛樂圈就唔係每個人都有名有姓喎 ……

蘇：蘇玉華 棠： 歐錦棠

互不認識
蘇 ：
我唔覺得自己出名o左就代表個個都識我喎，我到而家每次識新朋友都一定會自我介紹，免得人o地真係唔識我，好尷尬o架嘛！
棠 ：
嘩，乜你咁睇小自己？雖然我識新朋友時，都會自我介紹，但只係禮貌問題 …
蘇 ：
你識新朋友o個時，麻煩你笑o下，你個樣唔笑好惡呀。
棠 ：
o車，個個唔笑個樣都惡o架！個人唔惡咪得囉 … 你第一次見我o個時，你覺得我個樣惡唔惡o丫？
 
蘇 ：
我第一次見你？ … 係o係電視機見到你咋喎 … 我都唔識你 …
棠 ：
唔係呀，真係有講o野o個隻呀 … 唔記得呀？
蘇 ：
唔記得呀 … o係邊度呀？
棠 ：
o係百老匯電影中心呀 …
蘇 ：
啊 … 係呀 … o個次你o係o個度搞o左個有關李小龍o既會，咁o岩我又去o個度睇戲，所以撞到你。
 
棠 ：
我第一次見你，我就知你個人好真！
蘇 ：
咁犀利？睇o下就知？
棠 ：
唔係，係因為你失驚無神走o黎對我講o左一o的o野，就憑o個番說話，我就知你個人好真！
 
蘇 ：
o下？我講過o的咩呀？我o個陣時好似仲唔識你o架喎 …
棠 ：
最令我震撼o既係，你對我o個份信任呀！
蘇 ：
o下？我講過o的咩呀？
棠 ：
我o地之前係從來未見過對方，淨係知道對方係邊個，o個次第一次傾偈，我已經不期然咁有o左一份好莫名o既友情，好似識o左好耐咁！
蘇 ：
o下？我講過o的咩呀？
棠 ：
你真係唔記得呀？
下刪約十次重複問題及答案 …
棠 ：
講講o下發覺其實我o地識o左唔係好耐 …
蘇 ：
係喇，但係就有一種老朋友o既感覺！
棠 ：
我o地冇乜機會成日見到面，亦都冇約埋一齊出街食飯傾偈。
蘇 ：
好奇怪，但係每次偶然見到對方，我o地都好清楚大家諗緊乜，係咪唔開心呀咁 …
棠 ：
係呀，連大家o既情緒起伏都唔使講出o黎，而係感覺到o既。
   
犘斯密碼
棠 ：
我記得早陣子o係工作上面經歷o左一o的好唔開心o既事，我同佢o係電視台碰到，佢用o左一種好巧妙o既言語向我噓寒問暖，旁人無法聽得明我o地之間o既意思！呢o的係非一般o既朋友可以做到。
 
蘇 ：
真係好o既朋友唔使話成日見住，大家有o個份心o既，段友誼一樣會咁堅固，而事實上，呢行o既工作時間亦唔容許可以成日同朋友見面。
棠 ：
唔好話朋友，我老婆去o左北京讀書，我同我老婆都兩年冇見 …段關係一樣可以維持得咁好。
 
蘇 ：
尤其是身邊o既另一半，就更加唔應該因為見得少，而影響兩者之間o既關係。係唔好o既，就算日日見住都唔會有好結果。
 
棠 ：
我只要知道我老婆o係邊度，做緊o的乜，就已經好足夠。
蘇 ：
人生唔係淨係談情說愛，仲有好多好有趣o既o野可以做。
冇仔送終
棠 ：
我就係呢o的人喇，乜都想做，我太太又係一個無事忙o既人，我o地兩個都停唔落o黎o既！所以我o地都一致決定唔會要細路，我o地自己都唔夠時間用，點可能會有足夠o既時間去教育下一代？我冇仔送終o架！
 
蘇 ：
哈哈 …我都係，我始終覺得香港唔係一個良好o既環境俾小朋友成長。如果我o既子女將來生活得唔開心，我見到會好心痛，既然有呢個可能性出現，我選擇唔要下一代。
棠 ：
係呀，生個細路出o黎，要付出好大，唔同我o地以前個年代，細細個就要出o黎捱，要學識自立！
 
蘇 ：
喂，聽講你自細已經係太子仔o架，有家族生意o架喎！
棠 ：
生意仔咋，冇錯我係比好多同年紀o既小朋友幸福，但係我一放學要去幫屋企人手，一樣都係捱出o黎o架！
 
蘇 ：
o個個年代，幾乎十居其九o既細路都可以話天生天養，細細個就要自己照顧自己，我就覺得自己o既童年欠缺o左好多小朋友應該要有o既o野 …
棠 ：
係呀，一個細路仔應該要接觸不同o既知識，咁先至可以有一個更好o既成長過程，一個更優質o既生活。
 
想做去做
蘇 ： 講開優質生活，做o左咁多年人，係最近先開始學識好好咁享受人生，去做一o的自己開心o既事，甚至乎有o的工作唔想接o既，都情願唔做，唔強迫自己。
棠 ： 咁你以前做o既o野係咪自己鍾意做？
蘇 ： 都係o架，由我做舞台劇開始，直至做電視或者其他o既媒體，都係因為我想做先會去做…
 
棠 ： 我就唔係，我而家所做o既o野都係為o左幫助我o既舞台事業，你都應該好清楚，o係經濟上唔容許我淨係做舞台劇。
 
蘇 ： 我就因為揀Job做，我上年成年都冇接o野做，雖然o係經濟上變得冇咁穩定，但係我好開心，做o左好多之前冇時間做o既o野！直至今年先拍番劇。
棠 ： 咁咪好囉！我上年又停o左其他o野，專注做舞台劇，一口氣全年做o左五個舞台劇！今年又係先開始拍番劇，同做一o的其他o野。
 
給阿蘇 …

某程度上，我o地都係同一類人，大家都努力o係生命到搵一個平衡點。但有一樣o野，你比我利害，你對生命o個種熱愛程度，我冇辦法做到。 o係你身上，我找到一個字，「專」。

給阿棠 …

我o係電視上睇過你o既戲之後，我已經感覺到你係一個咩性格o既人，到我識o左你之後，發覺你o個種並不隨波逐流，無論o係幾惡劣o既情況下都能夠盡量表現到最好，我好開心，因為我冇睇錯。我都o係你身上找到一個字，「強」。

後話

訪問完畢之前，阿棠話：「有o的o野，唔係你就唔係你o既，整定o架！」

阿棠指的，是工作上。

熟識蘇玉華的，都知道她叫Louisa，簡稱阿Sa。但自從出現了一個年齡與資歷都差一截的Twins阿Sa之後，阿Sa就索性叫阿蘇。

訪問完畢之後，再回想，阿棠話：「有o的o野，唔係你就唔係你o既，整定o架！」

阿棠指的，原來是任何事件上。

 
 
新報 2004年8月8日