2018年1月22日

蘋果日報

李思捷以年輕版嘅梅姨形容蘇玉華

 

李思捷、蘇玉華(阿蘇)、狄龍同元秋日前喺尖沙嘴宣傳家庭喜劇電影《一家大晒》,首次執導嘅思捷話今次係想拍一部向過往家庭喜劇致敬嘅電影:「80年代冇手機,一家人攬住好溫暖嘅感覺,我好想表達呢種訊息。」阿蘇自爆最初係唔肯接呢部戲:「初時叫佢搵第二個演,我要好清楚了解角色,可唔可以做得好至係我最關注,經過深思熟慮後,我應承咗,感激思捷帶我去電影世界。」思捷就力讚阿蘇:「我諗唔到有邊個做得好過佢。我偶像係梅麗史翠普(Meryl Streep),佢就係我後生版嘅梅麗史翠普,呢個人做乜都得。」

首拍笑片

演慣大佬嘅狄龍今次初嘗笑片,佢批評不少導演冇做好本份,令香港電影沒落:「我唔開名,有導演對動作唔熟就交畀動作指導,之後唔理去食燒鵝,呢啲會慢慢走向死亡,香港電影就係咁,思捷就冇,拍乜都喺現場。」《一》片講家庭關係,狄龍話:「套戲係提醒我哋,家好緊要,家係起點亦係終點,夫妻間要包容、溝通、體諒,提醒男人唔好咁大男人,識得退先至有進步。其實冇手機嘅生活,我哋都經歷過,有愛就得。」元秋就話好珍惜今次同狄龍合作機會。

撰文:馮仁昭

 

狄龍因為想同元秋合作至會接拍笑片。

狄龍唔開名鬧爆某導演開開吓工去食燒鵝。

林敏驄個樣咁搞笑,但元秋都仲忍得。