2018年1月19日


都市日報

「蘇玉華做嘢好專注,乜都唔理勇往直前,甚至係唔畀人哋理⋯⋯」潘燦良是這樣形容其女友的。確實,私下的蘇玉華真的好有性格、好灑脫,皆因她做事從不隨波逐流、不輕易受人影響,就好似3年多前獲男友求婚,面對外界一直催婚,她卻認為一張婚書簽與不簽其實沒差,所以遲遲未結婚。

對另一半都一樣,蘇玉華自言絕不干涉對方的生活,即使意見分歧都可以你有你選擇、我有我態度。工作亦然,有別一般官方答案:「有就錦上添花,獎係一種鼓勵。」對於仍未奪電視獎項的蘇玉華來說,「我唔需要搵嗰個獎嚟證實我嘅存在價值!」最緊要是演好每個角色,對得住自己和觀眾。

繼去年無綫播出10年前的出土劇《蘭花刼》後,近日蘇玉華(阿蘇)終於有新劇推出!今次,她將聯同陳凱琳、朱晨麗及龔嘉欣等一再挑戰女人戲的《平安谷之詭谷傳說》。劇中眾人生活在一條封閉的村莊,長期面對嚴重的男女不平等問題,飾演陸家大妾的阿蘇雖為大當家,但其實只是丈夫(劉江飾)的一隻棋,不獲寵幸之餘,帶住囡囡翻頭嫁的她更一直卑躬屈膝,最終一班女人團結起來,反抗男權壓迫。

難求好劇本

說到此際,已經感受到《平》的劇力萬鈞,就連阿蘇都視之為其代表作,可謂過足戲癮,「遇到一個好劇本嘅機會率係愈來愈低,遇到好劇本、好角色、好對手就真係千載難逢,呢套劇基本上都具備,而且好多戲可以做,呢種好玩係令你就算好唔夠瞓、拍到好凍或好曬,你都願意好投入咁去完成,咁就足以令我知道,原來我好鍾意呢套劇!」
確實,近年坊間不少聲音批評大台劇水準參差,不是播放如《溏心風暴3》、《老表,畢業喇!》等續集的「炒冷飯」製作,就是重複採用同一批演員,搞到陳展鵬、蔡思貝、黃翠如等「老是常出現」,令觀眾生厭。好在阿蘇向來自我要求甚高,從不濫接工作,「我睇到劇本喜歡先接,產量唔多,但希望每次有份參演嘅戲都有水準,令觀眾覺得好睇、做得好,多過話成日都見到佢,所以我係一個貴精不貴多嘅演員,希望以後都係。」



Booking.com

朱晨麗好搶

那麼對於新一代的演員又有何評價呢?有人說新紮花旦的演技每況愈下,阿蘇卻不太認同,「好多嘢形成㗎喎!可能冇咁嘅劇本畀佢發揮、冇咁嘅角色畀佢掌握到呢!或者佢根本冇咁嘅訓練、根本就唔識演戲呢!唔可以淨係怪個演員囉,我覺得要睇吓有一個點樣嘅機會、角色喺度,如果一個演員能夠遇到一個好角色,佢就有得發揮,有個好嘅表現。」
正如《平》中飾演陸家三太太的朱晨麗,雖然角色戲分不重,但阿蘇卻認為最搶眼,「佢個角色好立體、好好玩,同我又好多對手戲,今次監製Casting真係做得好好,我有信心出嚟效果好好。」

談到角色受盡男權打壓,現實中,未知阿蘇對住男友又是否處於下風呢?與「劇團王子」潘燦良拍拖22年的她笑謂:「又唔會卑躬屈膝嘅,但都會小鳥依人,我唔會好大女人,但亦都有自己嘅主見。」因此在家中,一切關於電器、木工等問題通通交由男士負責,女人嘛,當然主力做好洗衫、煮飯等家務啦!

最民主拖友

然而,這對「老夫老妻」看似傳統,但其實思想不知幾開明,「我哋好民主嘅,男女都有自己嘅崗位,呢樣嘢邊個強就邊個做,對方係唔會參與任何意見,因為有啲嘢冇需要去拗、去迫,大家發揮長處,呢頭家先會和諧。」不過情侶間難免有摩擦,平日兩人都甚有霸氣,到底往往哪一方較強勢呢?阿蘇笑道:「唔係強勢嗰個贏,而係有道理嗰個贏,強權係冇幸福、冇前途㗎!」

對阿蘇來說,嗌交只是鬥氣、胡亂發洩情緒,亦是最容易導致一些不良後果;所以與其傷害感情,倒不如平心靜氣地討論,用道理說服對方,「我哋彼此都會聽嘅,工作上都會互相交流,有時佢會問『邊度搵我去做一樣咁嘅嘢,你點睇呀?』咁我就會同佢痛陳利害,但最後決定都喺佢度,正如我有嘢問佢,佢都係畀意見㗎咋,冇話你要聽晒我講,我又要聽晒你咁。」兩人的關係之所以甜蜜、長久,其實除了懂得互相尊重外,最主要是雙方的性格、興趣都夾得來,又難怪一路走下來都如此暢順。