2018年1月18日


壹週刊

整蠱王無人敢信 李思捷開戲狄龍唔敢接阿蘇:「咩料呀?咪玩!」

 

 

13年李思捷主持《玩嘢王》整蠱藝人,事隔多年整人形象依然深入民心,尤其是當他一臉正經的時候,伏味反而最濃。

 

夾啱時間籌備多時的電影《一家大晒》準備埋班,身為導演的李思捷親自出馬接洽心水演員,點知蘇玉華同狄龍大哥都覺得好可疑,恐防中伏被整蠱,狄龍更要搵太太出面查探,而曾經中招的阿蘇則WhatsApp同對方說:「咩料呀?咪玩!」棄用青春花旦

李思捷異性緣有幾暢旺,呢個唔使講大家都知,尤其是同公司一班姐仔、花旦分外投契,沒想到他處女執導的電影,竟然爆冷搵未曾合作過拍劇做對手,又唔係十八廿二嘅青春姐仔,竟然係實力派蘇玉華。李思捷透露自己初入行時,曾與阿蘇在旅遊特輯中扮過情侶,兩人相識十六年,不是頻頻食飯見面那一種,但每次見到面總是忍不住口花花:「Honey點啫!」阿蘇插嘴說:「佢成日調戲我!」

 

自覺新戲女主角需要有豐富的層次演繹,所以做開舞台劇的阿蘇最啱心水,於是短訊接洽,由於阿蘇上過《玩嘢王》做嘉賓,深信這是一個局,馬上回覆:「咩料呀?咪玩!」

 

見阿蘇有反應,李思捷即刻打電話報告詳情。「咦!傾落嚟真喎,不是柴娃娃一套鬧劇,佢真係有諗過度過啲細位,唔流喎,再盤吓思捷係咪有其他人選,加上佢好認真搵埋編劇一齊同我傾,無嫌我煩俾我樣樣事問到底,所以我最終都接受咗呢個邀請。」蘇玉華說。

 

唔要演員白做

 

李思捷點睇都是講情情塔塔多過講家庭,估你唔到他的處男作竟然拍探討家庭講父子情,戲中他找來相識多年,又啱傾的元秋做媽打,但講到明不會碌人情咭,唔會俾封「無言感激」利是就當片酬,要演員白做。

 

「佢哋個報酬一定要同個market成正比,這個是對演員的一份尊重。」李思捷說。

 

至於找來從未演過喜劇的狄龍做父親,連當事人都覺得自己何德何能,甚至同阿蘇一樣,覺得伏味濃,索性搵太太陶敏明「幫朕check吓」,狄龍表示:「佢搵我!我覺得李思捷會唔會整蠱我呢?所以我叫太太去打聽一下,透過電話聯絡,確定係真先敢出去同佢(李思捷)飲咖啡再詳談!」睇嚟李思捷都要自我檢討一下。

 

林敏驄奉命抽水

 

同李思捷friend過打band,對方開戲林敏驄奉命埋位,做鹹濕佬,因住太過投入俾對方投訴鹹豬手呀!